stasera go visto la trasmission in tv "Gaia" e i parlava de Venessia fassendo un quadro, sul suo futuro, cussì nero ma cussì nero, che saria da spararse.secondo lori,col dissolvimento dei giassi de le calote polari, Venessia xe destinada a essar somersa nonostante el "Mose" e tute le possibili difese.
e qua ghe vol 'na poesia:
Mascare…
mascare de cartapesta
immagini antiche de furbi Arlechini ridenti
Rosaure ardenti d’amor par Lindoro
el puto de sesto
foresto e senza coragio ma …
d’alto lignagio
e co’l servo in livrea
Brighela fedel servitor ossequiente
Che, roba, impudente, dadrio le spale al paron.
Pantalon che conta i zechini in mezà
Che tira sui prezzi
E crede, coi bezzi,
poder acquistar dignità
Pulcinela
Eterno afamà
Arguto e rufian
Che incarna,
l’alegra tristessa del Napoletan…
mascare…
mascare de cartapesta
che torna ogni ano a far festa
co xe carneval
par darghe, al mortal l’illusion
de star su la scena de un mondo diverso,
più bon,
mimando la parte de quei personagi
che ne” la comedia de l’arte”
ridendo, te invita a desmentegarte
la vera comedia
…la vita
Francesco Cavasin 17.12. 1979
1 commento:
Ti me ga fato vogia de rilezerme quela diesena de comedie de Goldoni che go messo sul scafal più alto de la libraria. Mezo secolo fa le recitavo da diletante de quel tempo me ze restà un saco de bei ricordi.
Posta un commento